4. nóvember 2014
Áfram nú, engar skyssur,
ókeypis hríðskotabyssur
nú láta má löggur fá.
Skorinorð skýrsla samin,
í skyndingu saman lamin,
hvaða skaðvalda skjóta má.
Hér má ei fara fetið,
flestöllu lekið á netið
svo fljótt sem auðið er.
Vill enginn við neitt kannast,
veit enginn hvað er sannast.
Verður og fer sem fer.
Geðið er gramt og lúið,
ég get ekki burtu flúið
því gamall ég orðinn er.
Ef ætti ég æskuþróttinn,
auðveldur væri flóttinn.
ég fljótt myndi forða mér.
Birgir Marinósson.